Koobka Janaraal Daa’uud 2024 ayaa soo gaaray heerkiisa sideed dhamaadka, iyadoo la sugayo kulamo waaweyn oo xiiso badan oo ay ka mid yahiin kulanka kooxaha ciidanka (Heegan vs Horseed), sidoo kale waxaa iska hor imaan doona kooxaha Dagmo wadaagga ah (Mogadishu City Club & LLPP Jeenyo).
Tartankaan oo ay ka qeybgaleen dhamaan 25-ka kooxood ee u diiwaangashan Xiriirka Kubadda Cagta Soomaaliya ayaa kulamo adag iyo tartan xiiso leh kadib soo tiigsaday heerkiisii ugu xiisaha badnaa.
Kooxda Difaacaneysa tartanka Dekedaha ayaa bilaabeysa furitaanka kulamada Sideed dhamaadka, waxeyna maanta (Sabti) la ciyaari doontaa kooxda Gaadiidka oo kulankii ugu dambeeyay kulan soo laabasho ah ku dishay Jamhuuriya.
Dhinaca kale Elman oo sanadkii hore kama dambeysta tartankaan gaartay ayaa la ciyaari doonta kooxda Gasco ee heerka labaad, waxaana la sugayaa hadii ay mar kale awoodi karto iney gaarto wareegyada ugu dambeeya ee tartanka.
Kulanka Heegan & Horseed oo ah mid ka mid ah kulamada ugu adag ayaa la sugayaa inuu qabsoomo (Axad – 17/11/2024), waana kulan labada kooxood nolol & geeri u ah, waana kulanka loogu yeero (Darbiga Ciidanka).
Intaas waxaa dheer in kooxaha Mogadishu City Club & LLPP Jeenyo ay is wajahi doonaan (Isniin – 18/11/2024), labadaan kooxood waa daris cadaw, waana kulan kale oo xiisahiisa wata oo aad loo wada sugayo.
ISKU AADKA SIDEED DHAMAADKA:
Sabti – 16/11/2024 : Dekedaha vs Gaadiidka
Axad – 17/11/2024 : Heegan vs Horseed
Isniin – 18/11/2024 : MCC vs Jeenyo
Talaado – 19/11/2024 : Elman vs Gasco
Wareega Sideed dhamaadka waxaa qorsheysan inuu soo dhamaan doono 19-ka November 2024, balse koox walba wey ogtahay kooxda ay la ciyaari doonto hadii ay u gudubto wareega afar dhamaadka tartanka.
Kulanka ugu horreeya Afar dhamaadka (Semi Final) waxaa is arki doona kooxaha kasoo kala gudba kulamada Dekeddaha vs Gaadiidka iyo Elman vs Gasco.
Halka kulanka labaad uu dhexmari doono kooxaha kasoo kala gudba kulamada Heegan vs Horseed & Mogadishu City Club & Jeenyo.
ISKU AADKA SEMI FINAL-KA:
Khamiis – 21/11/2024 : Dekedaha/Gaadiidka vs Elman vs Gasco
Jimco – 22/11/2024 : Heegan/Horseed vs MCC vs Jeenyo.
Si kooban: Kooxaha Dekedaha, Gaadiidka, Elman & Gasco – waxaa laga rabaa iney hal koox ka mid ah gaarto final-ka tartanka Janaraal Daa’uud 2024.
Si la mid ah kooxaha Heegan, Horseed, Mogadishu City Club & Jeenyo waxaa qasab ah in koox ka mid ah ay gaarto final-ka tartanka.
Kama dambeysta tartanka waxaa la qorsheeyay in la ciyaaro 24-ka November 2024.
Muxuu Yahay Tartankaan Janaraal Daa’uud?
Tartankaan sanadlaha ah waxaa lagu xusaa Janaraalkii ugu horreeyay oo uu yeesho dalkeena, sidoo kalana ahaa taliyihii ugu horreeyay ee ciidanka Xoogga Dalka Soomaaliyeed (Da’ud Abdulle Hersi) kaas oo sanadkii 1965 geeriyooday.
Xiriirka Kubadda Cagta Soomaaliya ayaa tan iyo sanadkii 1972 agaasimayay tartankaan xiisaha badan oo ah dhacdada labaad ee ugu weyn kubadda cagta dalka, waxaana sanad walba ka qeybgala dhamaan kooxaha u diiwaangashan Xiriirka Kubadda Cagta Soomaaliya.
Wixii faah-faahin ah fadlan kala xiriir:
Xafiiska Warfaafinta & Xiriirka Bulshada XCKS
Mogadishu – Somalia
E-mail:Media@footballsomalia.so