Muqdisho, Soomaaliya — 4 Sebtembar 2026: Garoonka Muqdisho Stadium ayaa maanta si rasmi ah loogu daahfuray Horyaalka Heerka Labaad ee Dalka, kaas oo qayb muhiim ah ka ah dadaallada Xiriirka Soomaaliyeed ee Kubadda Cagta ee lagu horumarinayo kubadda cagta gudaha dalka.

Munaasabadda daahfurka waxaa si rasmi ah u sameeyay Madaxweynaha Xiriirka Soomaaliyeed ee Kubadda Cagta (SFF), ahna Madaxweyne Ku-xigeenka Bariga iyo Bartamaha Afrika ee CECAFA, Mudane Cali Cabdi Maxamed.

Horyaalka Heerka Labaad ayaa ah fursad muhiim ah oo loogu talagalay kooxaha ka qeybgalaya inay tartan rasmi ah yeeshaan, isla markaana ciyaartoyda da’da yar iyo kuwa soo baxaya ay helaan fursado ay ku horumariyaan xirfadahooda.

Daahfurka Horyaalka ayaa sidoo kale muujinaya dadaallada joogtada ah ee Xiriirka Soomaaliyeed ee Kubadda Cagta uu ku ballaarinayo tartamada gudaha, korna ugu qaadayo heerka tartanka iyo tayada kubadda cagta Soomaaliya.

Xiriirka Soomaaliyeed ee Kubadda Cagta ayaa mudnaan gaar ah siinaya horumarinta tartamada heerarka kala duwan, iyadoo Horyaalka Heerka Labaad uu door muhiim ah ka qaadanayo dhismaha saldhig ballaaran oo kubadda cagta dalka ah.

Horyaalka ayaa hadda si rasmi ah u bilaabmay, waxaana la filayaa in kooxaha ka qeybgalaya ay soo bandhigaan tartan xiiso leh, iyadoo indhaha lagu hayo ciyaartoyda iyo kooxaha mustaqbalka u gudbi kara heerarka sare ee kubadda cagta Soomaaliya.

Xiriirka Soomaaliyeed ee Kubadda Cagta (SFF) ayaa ku boorrinaya dhammaan kooxaha, ciyaartoyda iyo taageerayaasha inay si wanaagsan uga qeyb qaataan Horyaalka, si loo xaqiijiyo tartan hufan oo xoojiya horumarka kubadda cagta dalka.